花膠螺頭花菇豬展湯

5-6隻花膠, 剪碎, 有人話剪得越碎, 花膠融入湯會更易吸收, 但我鍾意食花膠, 所以剪大少少 一磅豬展咁上下(太約廿零蚊, 有時無豬展, 百佳會有一PACK PACK豬展骨, 如果想食肉, 除咗豬展, 我都會揀西施骨, 勁好味), 總之無論如何, 買乜豬都好, 要先煲滾水出水, 咁啲湯先唔會帶咁多豬血 急凍螺頭大約4至5個 (視乎大小), 惠康有售嘅御品皇, 一包大約可以分兩至三次用, 一樣, 要用薑同酒出水, 辟腥, 但因為唔係乾貨, 唔使好似花膠咁要發, 即時喺冰格攞出嚟就用得, 不過如果記得嘅話, 提前一日融雪會好啲 海參就隨意, 我大約都係隨意落三四條, 百佳惠康都有南美海參, 兩隻肥手指大小, 出水方法同螺頭一樣, 陣間再講 冬菇, 我用SOGO COUNTER買嘅小花菇, 太約一五蚊銀大小, 一次大約十五粒, 視乎有幾鍾意食同幾豪 先煲一大壼滾水, 因為電壼一定快過煤氣, 我個壼兩公升, 勁好用 先用凍水洗洗冬菇, 沖走表面塵同雜質 然後用滾水浸冬菇, 咁樣會比較快 (但聽講只係細菇可以, 起碼我果包個包裝上係講明可用滾水, 大隻厚身嘅, 都係用返傳統方法用水喉水浸啦), 我會用多少少水浸, 因為冬菇水最後我會倒返菭去一齊煲湯, 勁香 浸冬菇嘅同時, 將啲材料出水, 以前我會分開, 呢兩次一煲熟, 快同埋唔使洗幾廿個煲 將所有材料(豬, 螺同海參)先沖沖水, 然後一嘢放晒入加咗薑片嘅滾水入面, 再加少少酒, 然後煲到滾, 會見到成個煲面都係豬血嘅凝結 豬肉, 視乎想唔想食同埋多唔多骨, 我平時會將佢切細先放入去出水, 方便食用 出完水之後, 滾水倒咗去, 用水喉沖沖啲料, 沖走啲豬血雜質 我會先鋪豬內喺煲底(煲湯煲, 方便出味), 再將螺頭用廚房剪剪開, 搣走橙色一PAT嘅內臟物體(唔係好大舊, 但一剪開就應該明我講乜), 然後將螺頭剪粒(容易食) 海參輕輕洗走中間啲核突嘢(因為出咗水, 一大力就爛), 又係剪細佢 呢個時候可以落埋花膠(剪細), 同埋將冬菇水倒入去, 將剪冬菇椗, 冬菇視乎大小, 可以剪細容易食; 冬菇椗剪去頂端污糟部位後, 可以放埋入去煲, 據聞有助降血壓 之後加入你想要嘅份量嘅滾水 總之所有材料入晒煲後, 我會再加一兩片金華火腿當調味, 咁就唔使煲完落鹽(百佳凍櫃有得賣, 或可以去南貨舖買啲勁啲), 重點係唔好貪多, 先落少少唔夠味下次再加. 所有材料連水一定要大火煲到滾, 再繼續煲多一兩分鐘, 咁先會出味 然後GUM低個火, 按你個真空煲指示, 煲夠時間就放入去 我個煲話煲15分鐘就可以放入去 留意, 1) 小心太大火走水(越煲越少), 2) 我會冚蓋煲, 所以唔好太滿, 免得滾瀉 .

花膠浸發

先用水喉水沖洗吓花膠表面 然後用煲浸過啲花膠, 如果放雪櫃,冚蓋後可以唔使換水 如果就咁放廚房, 就大概換三至四次水 浸一日已經全透(會由而家半透明黃色變成奶白唔透明色) 然後將浸過嘅水倒咗去, 再用水沖沖浸完出嚟嘅雜質(如有, 多數係啲血絲/塊之類) 煲一煲滾水, 放三四片拍過嘅薑 (視乎薑片大小或花膠多少, 可加可減), 再加少少酒 (孖蒸果類,無嘅話, 我都係用紹酒), 放啲浸過嘅花膠入去, 花膠遇熱水會勁縮, 係正常現象 咁等佢煲兩至三分鐘, 總之煲返滾煲水(放花膠入去時可能會降咗溫), 滾水後再煲一吓, 熄火, 倒走啲水, 夾走薑片, 啲花膠就用得 發咗嘅花膠先可以用嚟煲湯 一次過發多啲, 剩返嘅, 可以分開一分分雪喺冰格 咁每次煲提前一日放入普通格融雪就OK .